«ҚМГ Инжиниринг» ЖШС Атырау филиалының базасында ТШО, NCOC және ҚПО мамандарының тәжірибе алмасу бойынша бірлескен кездесуі өтті

«ҚМГ Инжиниринг» ЖШС Атырау филиалының алаңында Қазақстан Республикасының үш ірі мұнай-газ операторы: «Теңізшевройл» ЖШС (ТШО), «Норт Каспиан Оперейтинг Компани Н.В.» (NCOC) және «Қарашығанақ Петролиум Оперейтинг Б.В.» (ҚПО) өкілдерінің алғашқы бірлескен семинары өтті.

Бірегей салааралық алаң құру бастамасын оператор-компаниялардың өздері көтерді.

Ең ірі жер қойнауын пайдаланушылар озық тәжірибемен, техникалық шешімдермен және үздік өндірістік тәжірибелермен жүйелі түрде алмасуды жолға қою мақсатында күш біріктірді.
Жетекші операторлардың күш біріктіруіндегі басты міндет – еліміздің ең күрделі кен орындарын игеру кезінде компаниялар тап болатын ағымдағы және стандартты емес мәселелерді ашық талқылау.

Бірлескен сессия кез келген мұнай-газ жобасының іргелі негізі болып табылатын негізгі геологиялық аспектілерге арналды.

ТШО, NCOC және ҚПО сарапшылары кен орындарының геологиялық құрылысын зерттеудің жалпы тәсілдерін, сондай-ақ геологиялық модельдеу және геологиялық тәуекелдерді басқару саласындағы озық әлемдік тәжірибелер мен тәсілдерді талқылады.

«ҚМГ Инжиниринг» ЖШС Атырау филиалының базасында тарихи кездесудің өтуі институттың нарықтың негізгі ойыншыларын мұнай-газ секторының ортақ міндеттері төңірегінде біріктіре алатын жетекші ғылыми-техникалық орталық ретіндегі рөлін тағы да растайды.

Осындай сарапшылық сессиялар Қазақстанның мұнай-газ индустриясының дамуына қуатты серпін бере алады.

Бөлісу бағытындағы: